انواع الاخشاب الشائعة

انواع الاخشاب الشائعة

الخشب هانقسمه الى قسمين رئيسيين اولا: الاخشاب الطبيعية ( زى الزان والارو والموسكى..الخ) ثانيا: اخشاب مصنعة او اخشاب مسطحات( الكونتر وال إم دى إف والابلاكاج ..الخ) اولا: الاخشاب الطبيعة وفى البوست دة هانتكلم عن ثلاث أنواع فقط من اشهر انواع الخشب فى مصر واللى بيكثر استخدامها فى المنازل والمكاتب والمحلات والفنادق وفى كل مكان اولا: خشب الموسكى pine wood دى صورته عشان تبئوا عارفينه هو اكتر حاجة بتميز النوع دة من الخشب وجود العقد فيه خشب الموسكى يعد من ارخص انواع الاخشاب الطبيعة فى مصر وطبعا كل ما العقد كترت فيه سعره يقل اكتر وخاصة العقد الخبيثة اللى هى ممكن تقع منه بعد التصنيع وطبعا ساعتها هايكون شكل المنتج النهائى سىء للغاية. يعنى مثلا لو تم تصنيع ضلف مطبخ من الموسكى ذو العقد الخبيثة وبعد كدة العقد وقعت طبعا شكل الضلفة هايكون بشع وهى مخرومة طيب والواحد يعرف العقد الخبيثة من العقد الطيبة ( الحميدة) ازاى؟؟ العقد الخبيثة بتكون سودة جدا كأنها محروقة وحواليه فراغ بسيط بينها وبين باقى لوح الخشب لكن العقد اللى مافيش منها خوف هى العقد الفاتحة زى اللى فى الصورة اللى فوق دى صورة لكنبة مصنوعة من خشب الموسكى ولو تلاحظوا العقد اللى فيها بسيطة ومع الدهان تقريبا مش باينة بالعكس بتزيد الخشب جمال ودى ترابيزة مطبخ بالكراسى من خشب الموسكى وبرضه العقد اللى فيها بتديها جمال ويستخدم خشب الموسكى قليل العقد فى صناعة غرف السونا ولكن يفضل فى صناعتها الخشب العزيزى ومن اشهر استخدامات خشب الموسكى فى مصر ملل السراير والمطابخ وبعض انواع الانتريهات والابواب  ثانيا: الخشب الزان دة شكل الخشب الزان ولو تلاحظوا ان لونه مائل للإحمرار شوية ومسامة ضيقة جدا ومافيهوش اى عقد وخشب الزان مفضل جدا عند المصريين لانهم بيعتقدوا انه اقوى الانواع وتلاقى الواحد يجيب الانتريه وفخور اوى انه من خشب الزان لانه خشب بيستحمل ويوقلك خد راحتك فى القعدة واتجعص على الاخر دة خشب زان ولا يهمك المهم ان فى منطقة زى المناصرة فيه نوع تانى من الاخشاب انا مش فاكرة اسمه دلوقتى تقريبا اسمه مرانتى هو شبه الزان وللأسف مش اى حد يفرقهم عن بعض وبيستخدم فى صناعة غرف النوم وطبعا هو مش بقوة خشب الزان وبالتالى الغرفة لاتصمد كثيرا طيب والمشترى العادى يعرف الفرق ازاى؟؟ بصراحة هو صعب لكن ممكن عن طريق سعر الغرفة اللى هاتشتريها سواء نوم او سفرة او انتريه يعنى مثلا فى زماننا دة لا يمكن اى غرفة نوم مصنوعة من الخشب الزان تقل عن 10000 ج بأى حال من الاحوال وطبعا دة سعر رخيص جدا اللى انا بقوله دة وبالتالى لو غرفة نوم سعرها 7000ج او 8000ج تأكد انها مش زان او على الاقل مش كلها زان ثالثا: خشب الارو دى صورته خشب الارو من الاخشاب الصلبة المتينة والى كمان شكلها حلو وبتدى فخامة يعنى لو عملنا باب من الموسكى والتانى من الزان والتالت من الارو هتلاقى افخم باب فيهم شكلا هوالباب الارو خشب الارو اللى مصر نوعين أرو يوغوسلافى ودة الارخص والسبب ان الرطوبة فيه اكتر وأرو أمريكى ودة الاغلى لان رطوبته اقل ويبدأ سعر الارو من 6000ج الى 10000ج للمتر المكعب وبمناسبة المتر المكعب أحب اقولكم حاجة مهمة ان لما الواحد يقول متر خشب الارو مثلا 600ج دة معناه المتر المكعب من الخشب وطبعا الكلام دة بينطبق على جميع انواع الاخشاب الطبيعية وبلغة الصنعة نسميه الخشب الماسيف هانقول مثلا لما تيتجى تتفق مع نجار او مهندس عشان يعملك كرسى مثلا ازاى تحسب كمية الخشب الموجودة فى الكرسى دة مثلا رجل الكرسى ليها طول وعرض وارتفاع مثلا طول الرجل 5 سم وعرضها 5 سم وإرتفاعها 40سم عشان نعرف كمية الخشب المستخدمة فى رجل الكرسى دة هانحول السنتيمتر الى متر وتضرب الارقام اللى هاتطلع لك دى فى بعض هتلاقى الناتج اللى طلع لك 0.001ولما تضرب الرقم دة اللى هو واحد من ألف من المتر فى ثمن المتر المكعب للخشب الارو هانقول مثلا 6000ج الناتج النهائى هايكون 6ج يعنى سعر رجل الكرسى تساوى 6ج وبالطريقة دى تقدر تحسب اى حاجة ومحدش يضحك عليك فى نقطة تانية مهمة جدا فى الاخشاب الا وهى الرطوبة يعنى ايه رطوبة الخشب؟ لما نقول ان قطعة الخشب دى مرطبة يعنى فيها ميه ووزنها بيكون اتقل من وزن مثيلاتها المجففة وطيب ايه مشكلة الخشب اللى فيه رطوبة ؟ المشكلة انه ممكن يلف يعنى يتقوس وبالتالى المنتج هايبوظ وممكن يتشقق بعد الدهان وبالتالى الدهان هيبوظ طيب واحنا نعرف ازاى ان الخشب دة فيه رطوبة طبعا هو بالنسبة لغير المتخصصين بيكون مش سهل لان فيه جهاز لقياس درجة رطوبة الخشب وطبعا دة بيستخدم فى المصانع الكبيرة لان المصانع دى بتشترى كميات كبيرة من الخشب بالالاف الجنيهات وبالتالى لازم تطمن على الخام قبل التصنيع بس ممكن وانت بتشترى الخشب من المغلأ وهو المكان اللى بيتباع فيه الاخشاب تسأل اذا كان عندهم جهاز قياس رطوبة وطبعا اغلبهم بيكون عنده لان المغلأ هو كمان بيشترى كميات كبيرة

تعريف الخشب

هوه ماده عضويه بتشكل المكون الرئيسى فى الاشجار و وظيفته توصيل المايه و التغذيه للاوراق و الحاجات التانيه زى الزهور و الفواكه اللى بتطرح ع الشجر. الخشب كمان بيشكل دعامه بتسند النبات و بتخليه يقدر يكبر و يزيد فى الحجم و الطول.الماده الاساسيه فى تكوين الخشب هى السيليولوز. من زمان قوى و البشر ابتدو يتعملو الخشب كمصدر للنار و ك ماده يبنو منها بيوتهم و يصنعو منهم ادواتهم و اسلحتهم و عفشهم و حتى الورق اللى بيكتبو عليه.

انواع الخشب
الخشب ممكن يتقسم لنوعين : الاول هو الخشب الطبيعى و التانى هو الخشب الصناعى
1- الخشب الطبيعى
اخشاب لينة:
خشب الموسكى (Pine wood) و هو من ارخص انواع الخشب لوجود العقد الكتيرة فيه. وكل ما تزداد العقد كل ما قل سعره.
اخشاب صلبة:
خشب الزان ( Beech) وهو خشب قوى و شكله جميل و ما خالي من العقد.
خشب البلوط (الأرو) (Oak) و هو غالى الثمن وفخم الشكل و منه ارو يوجوسلافى و ارو امريكي
الصنوبر (Pine)
البتولا (Birch)
الدَردار (Ash )
المـاهوجني (Mahogany)
خشب الساج ( Teak )
خشب الجوز ( Walnut)
2- الخشب الصناعى
الابلاكاش عبارة عن طبقات رقيقة ملصوقة ببعض
الكونتر عبارة عن طبقتين وبينهم قطع خشب على هيئة شرائح الاقوى فى الخشب الصناعى
ال ام دى اف خشب صناعى الافضل فى الدهانات الالوان ولكن يجب استخدام دهان مقاوم للمياة لانة فى حالة استخدام دهان غير مقاوم فسوف يمتص المياة واكيد هيبوظ

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *